抵食平價正宗泰菜 @ 舢舨泰菜館

抵食平價正宗泰菜 @ 舢舨泰菜館

地址: 鰂魚涌鰂魚涌街121號太就樓地下7A及9A號舖

人均：$50

評分：4(最高是5分)

位於鰂漁涌太就樓地下，店內細，座位極少，約十多個位，一到午飯時間就要排隊，搭檯是常識，似乎附近打工仔都識搵到黎，要黎趁早！

無可避免要搭檯，但老闆娘好好，好熱心，幾有笑容的。第一次過黎，樣樣都想食，喇沙、椰子湯河粉、炒麵、海南雞飯等等，選擇都幾好多！自筲箕灣食開那間泰菜轉手後，就冇見過雙拼飯，雖然好邪惡，但點都要試下！

E 海南雞豬手飯 $48

一個價錢，雙拼份量足夠，完完全全飽土。味道正宗，海南雞脂肪較少，雞皮光澤，肉質較爽滑；雞油飯煮出來不太油膩 ，飯質乾而不黏身，飄來淡淡的香氣；豬手好食，豬皮煙韌，肉較軟腍入味不嚡口；仲有兩款醬汁比你「點」，酸酸辣辣幾開胃。

唔好厭棄擠擠迫迫，小店用心經營，食物質素好，多多支持吧！